Listen In — Buckie Braes

This recording is of the Perth poem Buckie Braes by William Soutar.
The Scots transcription uses the traditional literary conventions described in Wir Ain Leed, it is a transcription of what was said, not an attempt at phonetic accuracy and may differ from that of the author.

The audio file is hosted by the Friends of William Soutar.

It isna faur frae oor toun
By ony gate that gaes;
It isna faur frae oor toun
Tae gang tae the Buckie Braes;
Whaur the wee linn lowps the craigies
And whaur the cushats cruin;
And the happers in the growthy gress
Are diddlin ower thair tuin;
Wi a chickie-chick-chickerie,
Dickie-dick-dickerie,
Tickie-tick-tickerie,
Jiggety-jig.

Mony a bairn frae oor toun
In the canty simmer-days;
Mony a bairn frae oor toun
Haiks up tae the Buckie Braes,
Whaur the birk links in wi the rodden
And the burnie rinnles doun;
And the happers in the growthy gress
Are diddlin ower thair tuin;
Wi a chickie-chick-chickerie,
Dickie-dick-dickerie,
Tickie-tick-tickerie,
Jiggety-jig.